Пасяджэнне літаратурна-музычнай гасцёўні “Ад усёй душы” Шчучынскай раённай бібліятэкі імя Цёткі 25 студзеня было прысвечана літаратурным юбілеям 2023 года. Прагучалі вершы і песні Мар’яна Дуксы, Уладзіміра Карызны, Міхася Стрыгалёва, Анатоля Грачанікава, Яўгеніі Янішчыц, Кастуся Кірэенкі. Вялікую ўвагу надалі трагічнаму лёсу і багатай літаратурнай спадчыне Максіма Гарэцага, сёлета адзначаецца 130 гадоў з дня яго нараджэння. Кожны з юбіляраў унёс свой уклад у зберажэнне і развіццё беларускай мовы і літаратуры, і гэта для нас важна і каштоўна. Беларуская мова – гэта наша спадчына, і мы павінны зберагчы яе і перадаць наступным пакаленням.
